გლობალური ეკონომიკის რეცესიის პირობებში ყველაზე დაუცველები ჩვენაირი იმპორტდამოკიდებული ქვეყანები არიან, ახალმა კორონავირუსმა (COVID-19) მსხვილი ბანკებით დაწყებული, ტურიზმით თუ ავტოიმპორტით დამთავრებული, ეკონომიკის არაერთი სექტორი დააზარალა, შესაბამისად მთავრობამ ეკონომიკის სტიმულირების პოლიტიკაზე დაიწყო ნაბიჯების გადადგმა.
პრემიერ-მინისტრის ხელმძღვანელობით შექმნილი უწყებათაშორისი საკოორდინაციო საბჭოს გადაწყვეტილებით, ავტოიმპორტიორების ხელშეწყობის მიზნით, საქართველოს ფინანსთა სამინისტრომ მიიღო გადაწყვეტილება ავტოიმპორტიორებს 2020 წლის 1 აპრილამდე შემოყვანილი ავტომობილების განბაჟების ვადა გაუხანგრძლივოს. ფინანსთა მინისტრის ბრძანების შესაბამისად, არ გამოიყენება პასუხისმგებლობის ზომები/სანქციები იმ პირთა მიმართ, რომლებიც ვერ შეძლებენ 2020 წლის 1 აპრილამდე შემოყვანილი ავტომობილის რეექსპორტს შემოყვანიდან 90 დღეში, თუ ამ ავტომობილის რეექსპორტი ან მის საბაჟო პროცედურებში მოქცევა მიმდინარე წლის 1 სექტემბრამდე განხორციელდება. შეღავათი შეეხება, დაახლოებით, 38 ათასამდე მანქანის მფლობელს და გადავადებული გადასახადების ოდენობა შეადგენს 50 მილიონ ლარს.
