2021 წლის ბოლოს, კომპანია Honda, ფორმულა ერთს ოფიციალურად დატოვებს. შეიძლება ითქვას, რომ მოწმენდილ ცაზე, მეხი გავარდა. ამდაგვარ სცენარს არავინ ელოდა. ყველაზე რთულ სიტუაციაში, Red Bull Racing და AlphaTauri აღმოჩნდა. მათ ბოლიდებს ხომ Honda-ს ძრავები ედგათ ? Red Bull Racing-ს ყოფნა-არყოფნის საკითხი დაუდგა. არამგონია სკანდალური განშორების შემდეგ, ავსტრიელებმა ისევ Renault-ს მიმართონ. დიტრიხ მათეშიცი (Dietrich Mateschitz), Mercedes-თან თანამშრომლობას არც კი განიხილავს, ხოლო Ferrari-ის ძრავები, რომ შეიძინონ საჭიროა მყარი გარანტიები, რომ 2022 წლისთვის, იტალიელები, სიმძლავრის ნაკლებობასთან დაკავშირებულ ხარვეზს აღმოფრიან. 
მაშ სხვა რა ვარიანტი აქვს, Red Bull Racing-ს და AlphaTauri-ს ? გერმანული Auto Bild-ის ცნობით, Red Bull-ის გუნდს მიზნად აქვს დასახურლი, 2022-2023 წლის სეზონი საკუთარი ძრავებით იასპარეზოს. ეს კი მეტად ამბიციური განაცხადია. ასევე ყველასათვის ცნობილია, რომ Red Bull Racing, აქტიურად აწარმოებს მოლაპარაკებას, ენდი კოველთან (Andy Cowell). ის Mercedes AMG High Performance Powertrains-ის დირექტორი გახლავთ. ენდი სულ მალე თანამდებობის დატოვებას აპირებს. შესაბამისად, Red Bull Racing-ს სურს, გენიალური ინჟინერი თავის რიგებში იხილოს.
მაგრამ რას მოიმოქმედებს Red Bull Racing 2026 წელს ? ფორმულა ერთი, ხომ ახალი თაობის ძრავებზე აპირებს გადასვლას ? Auto Bild-ის ცნობით, Red Bull-მა თადარიგი უკვე დაიჭირა. ისინი მოლაპარაკებას Volkswagen–თან აწარმოებენ. ინსაიდერული ინფორმაციის თანახმად, 2026 წელს, ფორმულა ერთში Volkswagen, Porsche-ს ბრენდის ქვეშ დაიწყებს ოპერირებას.
მიუხედავად იმისა, რომ Red Bull Racing-მა მაქს ფერსტაპენს სამ წლიანი კონტრაქტი უკვე გაუფორმა, შექმნილ სიტუაციას, ფერსტაპენი განსაკუთრებული ყურადღებით დააკვირდება. კონტრაქტის თანახმად, Red Bull Racing ვალდებულია, პილოტი უზრუნველყოს, კონკურენტუნარიანი ძრავებით. შესაბამისად, რედ ბულს ბეწვის ხიდზე მოუწევს გავლა.
