კომპანია Audi-იმ სპეციალური მოდელის, TT RS-ის წარმოება დაანონსა. შეიძლება ლეგიტიმური კითხვა დაგებადოთ: რა აქვს ამ მოდელს სპეციალური და განსაკუთრებული? საქმე იმაშია, რომ 40 წლის წინ, 1980 წლის 3 მარტს, ჟენევის ავტოშოუზე კომპანია Audi-იმ, Ur-Quattro წარადგინა. ამ მნიშვნელოვანი მოვლენიდან 40 წელია გასული. შესაბამისად ამ თარიღს მიუძღვნეს ლიმიტირებული მოდელი, TT RS „40 Years of Quattro“. ჯამში 40 ეგზემპლარის წარმოებაა დაგეგმილი, ისიც გერმანიის ბაზრისთვის.
TT RS „40 Years of Quattro“ ისეთივე ფერებში იქნება, როგორიც 1987 წლის, Walter Röhrl-ის, Audi Sport Quattro S1-ის სპეციალური ვერსია, რომელიც „Pikes Peak“ ეტაპისთვის იქნა დამზადებული. თანამედროვე მოდელის ექსტერიერი, რა თქმა უნდა, ისეთივე შთამბეჭდავი ვერ იქნება, მაგრამ ისიც დასაფასებელია, რომ კომპანია დიდ ისტორიას არ ივიწყებს.
რაც შეეხება, TT RS „40 Years of Quattro“-ს ტექნიკურ მონაცემებს, ის აღჭურვილი იქნება: ხუთცილინდრიანი, 2.5 TFSI ძრავით და დაწყვილებული იქნება 7 საფეხურიან, ორმაგი გადაბმულობის გადაცემათა კოლოფთან. ლიმიტირებულ აუდი, 394 ცხენის ძალის და 480 ნიუტონ მეტრის გამომუშავებას შეძლებს. სიმძლავრე, წინა და უკანა ღერძებს შორის, მრავალდისკოიანი გადაბმულობის წყალობით გადანაწილდება. 0-დან 100 კმ/სთ-ს, სულ რაღაც 3.7 წამში განავითარებს. ცუდი მონაცემები ნამდვილად არაა, მაგრამ ნამდვილი მონსტრისგან ძალიან შორს დგას.
ინტერიერი მძღოლზეა ფოკუსირებული, კოკპიტი არაა გადატვირთული ღილაკებით. გაწყობილია ალკანტარით. აქ არის RS-ის საფირმო სპორტული სავარძლები, უკანა სავარძლების მაგიერ, ნახშირბადის ბოჭკოსგან დამზადებული განმბჯენია (распорка) დამონტაჟებული. ავტომობილი 2020 წლის ოქტომბრის ბოლოს იქნება ხელმისაწვდომი თუ მოგეწონა და გსურს დაეუფლო ლიმიტირებულ TT RS-ს, მაშინ 114,040 ევროს გამზადება მოგიწევს.
